Патшалықтың шуақты климаты оны су аттракциондарын тамашалауға таптырмас орынға айналдырады. Мұнда Оңтүстік-Шығыс Азиядан тыс жерлерге де танымал көптеген аквапарк бар. Отбасыңызбен, достарыңызбен немесе жалғыз саяхаттасаңыз да, мұнда бассейндерден бастап қызықты тақырыптық ойын-сауықтарға дейін көңіл көтерудің сан алуан түрін таба аласыз.

Чонбури (Джомтьен/Паттайя)

Columbia Pictures Aquaverse

Джомтьенде, Паттайядан оңтүстікке қарай 20 минуттық жерде орналасқан Columbia Pictures Aquaverse — Columbia Pictures киностудиясының фильмдеріне арналған әлемдегі алғашқы тақырыптық аквапарк. «Елес аулаушылар», «Джуманджи», «Монстрлар демалыста» және «Жаман жігіттер» фильмдерінің жанкүйерлері мұнда ерекше әсерге бөленері сөзсіз!

Ең қызықты аттракциондардың бірі — Jumanji Jungle Adventure жылдам су сырғанағы. Ghostbusters Proton Stream аттракционында салмен төмен қарай сырғанап, иірімдер мен күрт бұрылыстардан өтіп, елестерді қуалай аласыз. Ал Hotel Transylvania Kid Zone аймағындағы шағын сырғанақтар кішкентай қонақтарға арналған.

Columbia Pictures Aquaverse саябағында Шығыс Таиландтағы теңдесі жоқ серфинг симуляторы FlowRider арқылы су спортындағы шеберлігіңізді сынап көре аласыз. Жаңадан бастаған болсаңыз да, тәжірибелі маман болсаңыз да, білікті нұсқаушының көмегіне жүгіне аласыз. Ал жай ғана демалып, жасанды лагунадағы Mega Wave Pool бассейнінде толқынмен тербелуді қаласаңыз, мұнда оның да мүмкіндігі бар. Бассейн ойын-сауық орталығының қызметін де атқарады: мұнда басты сахнада жанды музыка қойылымдары мен ашық аспан астындағы фильм көрсетілімдері ұйымдастырылады.

Aquaverse Оңтүстік-Шығыс Азиядағы ең заманауи аквапарктердің бірі саналады. Мұнда Олимпиада ойындарында қолданылатын жүйеге ұқсас заманауи су сүзгілеу жүйесі орнатылған, бұл ағынды судың сыртқа төгілмеуін қамтамасыз етеді.

  
*фотосуреттер ресми сайттан алынған

Ramayana Water Park

Ежелгі, тропикалық джунгли арасында жоғалып кеткен қала стилінде безендірілген Таиландтағы ең ірі аквапарк. Мұндағы мүсіндер, жұмбақ қирандылар мен қалың жасыл желек уақыт ішінде саяхаттап жүргендей әсер қалдырады. Ramayana Water Park қонақтарын 20-дан астам су сырғанағы мен аттракцион күтеді. Мысалы, адреналинді ұнататындар AquaLoop және Freefall жылдам сырғанақтарын тамашалай алады. Ал асықпай демалғанды ұнататындарға рафтингке арналған сырғанақтар, толқынды бассейндер және баяу ағып жататын Lazy Wavy River ұнайды. Кішкентай саяхатшылар үшін үлкен Aqua Play ойын-сауық аймағы мен аласа сырғанақтары бар қауіпсіз балалар бассейні қарастырылған. Ramayana демалыстың жайлылығына да мән береді: саябақ аумағында көлеңкелі күркелер, түрлі дәмханалар мен мейрамханалар, тіпті массаж қызметтері де бар.

Ең бастысы, Ramayana — экологиялық талаптарды сақтайтын аквапарк. Мұнда табиғатқа келетін зиянды азайту үшін хлор қолданылмайды. Табиғатпен үйлесімді демалып, уақытты барынша көңілді өткізгісі келетіндер үшін таптырмас таңдау.

  
*фотосуреттер ресми сайттан алынған

Хуа Хин

Vana Nava Water Jungle

Такиаб жағажайының маңында орналасқан. Хуа Хиннің орталығынан мұнда оңай жетуге болады, сондықтан аквапарк жергілікті тұрғындар мен шетелдік туристер арасында танымал. Vana Nava Water Jungle аумағында 20 түрлі аттракцион мен ойын-сауық түрі бар. Олардың қатарында бірнеше адам бір уақытта сырғанай алатын Abyss және салмақсыздық сезімін тудыратын Boomerango сырғанағы бар. Аквапаркте балаларға арналған интерактивті ойын алаңы мен серфинг симуляторы да қарастырылған. Vana Nava заманауи технологияларды кеңінен қолдануға ұмтылады. Мысалы, RFID білезіктері арқылы шкафтарды ашып, сатып алулар үшін төлемді байланыссыз жасауға болады.

Пхукет

Andamanda

Оңтүстік Таиландтағы ең ірі аквапарк 2022 жылы ашылған. Оның дизайны тай аңыздарынан және өңірдің бай суасты әлемінен шабыт алған.

Аквапарк бес тақырыптық аймаққа бөлінген. Олардың әрқайсысы корольдік тарихындағы белгілі бір кезеңді немесе елдің географиялық ерекшеліктерін бейнелейді.

Негізгі аттракциондардың қатарында биіктігі үш метрге дейін жететін толқындар жасай алатын The Great Andaman Bay бассейні және достарыңызбен немесе жақындарыңызбен жарысуға арналған бірнеше жолақты The Racing Nagas сырғанағы бар. Ал ерекше әсер іздейтіндер Naga Jungle аймағындағы өңірдегі ең биік әрі ең тік сырғанақтардың бірқатарын сынап көре алады.

Splash Jungle Water Park

Май Кхао жағажайы мен Пхукет әуежайының маңында орналасқан. Бұл тізімдегі басқа аквапарктермен салыстырғанда көлемі шағындау болғанымен, әлем бойынша саяхаттау тақырыбымен ерекшеленеді. Мұнда Азия, Африка, Еуропа және басқа да өңірлерден шабыт алған тақырыптық аймақтар бар.

Негізгі аттракциондары — Super Bowl, Lazy River және Aqua Play Pool. Соңғысы таяз сырғанақтарына қарап, кішкентай балаларға арналғаны байқалады, ал ересектер мұндағы ыстық бұлақтарды бағалайтыны сөзсіз. Splash Jungle Пхукеттің солтүстігінде демалып жүрген отбасылар үшін ыңғайлы. Аквапарктің аумағы шағын болғандықтан, ұнаған аттракциондардың барлығын жарты күннің ішінде сынап көруге болады.