Kids Go Free бағдарламасы бойынша 6 баласы бар 3 отбасы, 5 баласы бар 4 отбасы және 4 баласы бар 18 отбасы демалысқа тегін ұшып барды, деп хабарлады Қазақстандағы ірі туроператорлардың бірі.

Биыл Қазақстанның туроператорлары тарихта алғаш рет мемлекет тарапынан нақты қолдау шараларына ие болды.

Жыл басынан бері туристік бизнес өз қызметін дамыту және ауқымын кеңейту үшін субсидияларға үміт арта алады – бұл туристік автобустар сатып алуға, туристік нысандар салуға жұмсалған шығындардың бір бөлігін өтеуді, сондай-ақ шетелдік туристерді қабылдауға кеткен шығындарды өтеуді қамтиды.

Ал елдегі ұйымдастырылған демалыс мәдениетін, яғни алдын ала жоспарланған әрі соның арқасында қолжетімдірек демалысты дамыту мақсатында мемлекет балаларға ата-аналарымен және жақын туыстарымен бірге туристік пакет бойынша саяхаттаған жағдайда тегін әуе билеттерін ұсынды.

Бұл механизмнің іс жүзінде қалай жұмыс істегенін Қазақстандағы ірі туроператорлардың бірінің Астана филиалының директоры Ералы Тілеуовтен білдік.

«Kids Go Free бағдарламасы ресми түрде қаңтар айынан бастап жұмыс істей бастады, бірақ қаңтардағы оқиғаларға байланысты оны белсенді түрде тек наурыздағы демалыс кезінде пайдалана бастадық. Наурыз айының басында пакеттелген турларды сатуды бастап, клиенттерімізге отбасымен бірге Наурыз мерекесін атап өту үшін Түркістанға демалуға баруды ұсындық.

Осы сынақтан кейін жазғы маусымға арналған ұсыныстарды дайындап, оларға Ақтау, Алматы және Түркістан бағыттарын қостық. Шомылу маусымын ескере отырып, өтінімдердің басым бөлігі Ақтауға, Каспий жағалауына түсті.

Осы уақытқа дейін мақтанышпен айта аламын: біздің туристік компания Kids Go Free бағдарламасы бойынша ең көп туристке қызмет көрсетті. Бізден 449 отбасы туристік пакет сатып алды, яғни 870 бала біздің компания арқылы тегін ұшты.

Ең қызығы, Kids Go Free бағдарламасы көпбалалы отбасыларға қолжетімді демалыс ұйымдастыруға мүмкіндік берді, олар қомақты қаражатты – биыл саяси мәселелерге байланысты билеттердің қымбаттап кеткенін ескерсек, 30%-ға дейін үнемдеді.

Бағдарлама туристік компаниялардан туристік пакет сатып алатын барлық қазақстандықтарға қолжетімді. Туристік пакеттің басты шарты – оның құрамында әуе тасымалы мен орналастыру қызметінің болуы. Бұл ретте тур құрамында қанша баланың ұшатыны маңызды емес.

Мысалы, бізде 6 баласы бар 3 отбасы, 5 баласы бар 4 отбасы және 4 баласы бар 18 отбасы болды. Бұл отбасылар саяхатқа арналған бюджетін едәуір үнемдеді. Мұндай үрдіс жоспарланған отбасылық демалыс мәдениетін қалыптастыратыны сөзсіз, бұл өз кезегінде жергілікті жерлерде көрсетілетін туристік қызметтердің сапасын жақсартуға ықпал етеді.

Бағдарлама енгізілгенге дейін елде Қазақстан бойынша туристік пакеттер алу үшін туристік компанияларға жүгінетін отбасылар аз болды. Бұл негізінен шығу туризмі бағытында жұмыс істеді және әлі де жұмыс істеп келеді.

Kids Go Free бағдарламасының арқасында қазақстандықтар өз елінде де туристік компанияларға жүгінуге болатынын және бұл жағдайда демалысты өз бетінше ұйымдастырғаннан гөрі жайлырақ болатынын түсінді.

Біз бағдарламаның әлеуетін әлі де ашуды жалғастырып жатырмыз. Біз үшін де, бағдарламаға ерікті түрде қатысып отырған көптеген басқа туристік компаниялар үшін де бұл жылды сынақ жылы деуге болады. Өйткені бұл механизм Қазақстанның туристік нарығы үшін мүлдем жаңа.

Менің білуімше, мұндай шара үкімет деңгейінде тарихта алғаш рет енгізіліп отыр. Бұған дейін мұндай бағдарламаларды маусымаралық кезеңде әуе кемелерін толтыру үшін жекеменшік әуе компаниялары іске асыратынын көрдік.

Автор: Диляра Наримбетова

Дереккөз